*کھان بولن تے نیندر دے آداب* . شیخ جنید بغدادی اک دفعہ آپنے مریداں تے شاگرداں نال بغداد دے دورے لئی نکلے اونھاں نیں کسے کولوں حضرت بہلول بارے پچھیا،
*کھان بولن تے نیندر دے آداب*
.
شیخ جنید بغدادی اک دفعہ آپنے مریداں تے شاگرداں نال بغداد دے دورے لئی نکلے اونھاں نیں کسے کولوں حضرت بہلول بارے پچھیا، اونھاں نوں کسے آکھیا سرکار اوہ تے اک مجروب تے دیوانہ اے آپنے کھونڈی نوں گھوڑا بنا کے اوھدی سواری کردا رہندا اے ، شیخ صاب نیں آکھیامینوں اوسے دیوانے نال کم اے کسے اونھاں نوں اج ویکھیا اے ؟؟
اک نے دسیا میں اونھاں نوں فلاں جگہ ویکھیا اے سب اودھر چل پئے، حضرت بہلول اوتھے ریت تے بیھٹے ھوئے سن ، شیخ صاب نیں اونھاں نوں سلام کیتا، حضرت بہلول سلام دا جواب دتا تے پوچھیا کون او؟
شیخ صاب جواب دتا ، میرا ناں جنید بغدادی اے ، بہلول آکھیا اوھو ای جہڑا لوکاں نوں درس دیندا اے ؟ آکھیا جی الحمدللہ۔
بہلول ھوراں پچھیا شیخ صاب کھان دے آداب جاندے او؟
جنید بغدادی آکھیا،
بسم اللہ پڑھنا ، آپنے اگے توں کھانا، برکی (لقمہ) نکی لینا، سیدھے ہتھ نال کھانا، چنگی طراں چب کے کھانا، دوجیاں دی برکی(لقمہ) تے نظر ناں رکھنا ، الله تعالیٰ دا ذکر کرنا، الحمدللہ کہنا، اول و آخر ہتھ پانی نال چنگی طراں صاف کرنا۔
حضرت بہلول آکھیا، لوکاں دے مرشد او پر کھان دے آداب دا نئیں پتہ ، آپنے کپڑے چھنڈے تے اوتھوں ہٹ کے اگے جا بیٹھے .
شیخ صاب وی پچھے چل پئے، مریداں آکھیا، سرکار دیوانہ اے چھڈو پراں پر شیخ صاب بہلول ھوراں پچھے اپڑ گئے فیر سلام کیتا۔ بہلول ھوراں سلام دا جواب دتا تے فیر پچھیا کون او؟
آکھیا جنید بغدادی جہڑاکھان دے آداب نئیں جاندا ،بہلول ھوراں پچھیا چل بولن دے آداب تے جاندے ھوو گے۔
شیخ صاب آکھیا الحمدللہ، بولن آلا سامنے آلے بندے دے مزاج مطابق بولے، بےموقعہ، تے بےحساب ناں بولے، ظاہر و باطن دا خیال رکھے۔
بہلول ھوراں آکھیا کھان تے کھان، تہانوں تے بولن دے آداب وی نئیں پتہ ، بہلول ھوراں نیں فیر کپڑے چھنڈے تے تھوڑا اگے جا کے بیٹھ گئے۔
شیخ صاحب وی اوتھے جا اپڑے سلام کیتا۔ بہلول ھوراں سلام دا جواب دتا، تے فیر اوھو ای سوال کیتا کون او؟
شیخ صاحب آکھیا، جنید بغدادی جہڑا کھان تے بولن دے آداب نئیں جاندا۔
بہلول ھوراں آکھیا چل سوون دے آداب ای دس دوو ؟
شیخ ھوراں آکھیا عشاء دی نماز بعد، ذکر تے تسبیح، سورتاں تے او سارے آداب دس دتے جہڑے روایتاں وچ ذکر ہوئے نیں۔
بہلول ھوراں آکھیا تہانوں تے سوون دے آداب وی نئیں پتہ تے اٹھ کر اگے جان لگے ، شیخ صاب بہلول ھوراں دا جھولی پھڑ لئی تے آکھیا جے میں نئیں جاندا تے تہاڈا دسنا واجب اے۔
بہلول ھوراں آکھیا جہڑے آداب تسیں دسے او فرع نیں تے اصل کج ھور اے،
اصل اے وے ،
*جہڑا کھا رئے او حلال اے یاں حرام، لقمہ حرام نوں جنا وی ادب لحاظ نال کھاؤ او دل وچ ھنیرا ای لیائے گا نور تے ہدایت نئیں، شیخ صاب آکھیا جزاک اللہ۔
بہلول ھوراں آکھیا کلام اے وے ،
* کہ جہڑا بولو الله تعالیٰ نوں راضی کرن لئی بولو جے کسے دنیا دے مطلب لئی بولو گے تے مندا ای بولو گے تے جان لئی وبال بن جائے گا۔
*سوون دے اصل آداب اے نیں کہ،
سوون توں پہلاں ویکھو دل وچ کسے مؤمن یا مسلمان دا بغض حسد تے کروت لیکے تے نئیں سون لگے، دنیا دی محبت، مال دی فکر وچ تے نئیں سون لگے، کسے دا حق مار کے تے نئیں سون لگے ۔۔۔
«انتخاب تے پنجابی ترجمہ افضل پنجابی»
Comments
Post a Comment