تہاڈی قوم پرستی تہاڈی اپنی ذات لئی اے یا تہاڈی قوم لئی؟

 تہاڈی قوم پرستی تہاڈی اپنی ذات لئی اے یا تہاڈی قوم لئی؟

سیاست وچ لوکاں دی دلچسپی دو طرح دی ہوندی اے۔ 

1۔ اک تے دوجیاں دی سیاست تے خالی تبصرے کرن لئی۔

2۔ دوسری اپنے خیالات دے مطابق عملی جدوجہد کرن لئی۔ 

اپنے خیالات دے مطابق عملی جدوجہد دے وی دو مقاصد ہوندے نیں۔ 

1۔ اک اے کہ لوکی ایس لئی تنظیم بنالیندے نیں کہ دوستاں یاراں دے سامنے اپنی چودھراہٹ دی دھاک بیٹھا سکن تے اے ثابت کرسکن کہ اسیں بڑے نظریاتی تے عوامی احساسات رکھن والے آں۔

2۔ دوجا او لوکی ہوندے نیں جو اپنے مشن دی تکمیل وچ مصروف ہوندے نیں۔ ایس لئی اپنی ذاتی تشہیر یا پسند ناپسند تو مبرا ھوکے کم کردے نیں۔

انج ای قوم پرستی دی سیاست کرن والیاں دا حال اے کہ؛ یا تے او اپنی ذات لئی کم کردے نیں یا قوم لئی....

قوم لئی کم کرنا بڑا مشکل اے۔ قوم پرستی دی سیاست کرن لئی سال وچ کوئی دو چار تقریبات نئیں کروانیا ہوندیا۔ بلکہ سال دے 365 دن اپنی قوم دا سیاسی شعور ودھان دے نال نال اپنی قوم دے دشمناں نوں منہ وی دینا ہوندا اے.... 

انج تے 21 صدی شروع توں ای Globalization دی صدی اے۔ لیکن Covid 19 توں بعد دنیا وچ Physical دی جگہ سب کج Online ہوندا جا ریہیا اے۔ ایس لئی سوشل میڈیا پلیٹ فارم ای اج کل دے ڈیرے ' چوپال یا بیٹھک نیں۔ ایتھے ای بیٹھ کے لوکاں دے نویں نظریات بنن گے تے پرانے ختم ہون گے....

پوری دنیا وچ پنجابی قوم دی آبادی 20 کروڑ توں ودھ اے۔ جدکہ پاکستان وچ 12 کروڑ اے۔ ہن اک بندہ جسمانی طور تے ودھ توں ودھ دس ہزار یا زیادہ تو زیادہ اک لکھ (جو کہ ناممکن اے) بندے نال رابطہ رکھ لیوے گا۔ لیکن باقی بندیاں تک اپنی گل کنج پہنچائے گا؟

فیس بک تے ہر بندے کول 5000 فرینڈز دی گنجائش اے۔ ہن کوئی دو چار سو میوچل فرینڈ کھڈ دیو تے فر وی ہر بندے کول 4500 فرینڈ نویں ھوندے نے۔ ایس لئی جے روز دی بنیاد تے انہاں نوں قوم پرستی دا سیاسی شعور ودھان والیاں تحریراں لبھن تے فے کج عرصے وچ انہاں چوں کوئی دس فیصد دی سوچ تے بدل جاوے گی تے انہاں وچ قوم پرستی دا سیاسی شعور جاگ جاوے گا۔

ویکھیا جاوے تے سوشل میڈیا تے پوسٹ کرن وچ اک منٹ توں وی گھٹ ٹائم لگدا اے۔ پر اس تحریر نوں لکھن وچ گھنٹیاں توں ودھ بلکہ دیہاڑے لگدے نیں۔ اک اک نقطے نوں کئی کئی واری چیک کیتا جاندا اے کہ کوئی اعداد و شمار غلط نہ ہووے۔ لکھن توں پہلے کتنا کج پڑھنا پیندا اے؟ اے کم سال دے 365 دن جاری رہندا اے۔ اے کم سال وچ دو تین واری سڑک تے کھڑے ہو کے نعرہ لان والے کم توں بہت اوکھا اے نالے صبر آزما کم وی اے۔

پنجابی قوم دی پاکستان وچ تعداد 12 کروڑ اے۔ سوشل میڈیا دے ذریعے پہلے انہاں وچ قوم پرستی دا سیاسی شعور ودھاؤ تے فر انہاں نوں کٹھا کرو۔

‏❞ کسی ناکام تحریک دی سب توں وڈی غلطی اے ھوندی اے کہ؛ او مقصد توں لاعلم لوکاں نوں کٹھا کر لیندی اے۔ 

تحریک نوں کامیاب بنان لئی؛ پہلے خاص مقصد لئی لوکاں دا ذھن تیار کرو فے انہاں نوں کٹھا کرو۔❝